దరఖాస్తు చేస్తే 5 రోజుల్లో రేషన్‌కార్డు:బొత్స

అమరావతి: నిత్యావసరాల కోసం ప్రజలెవరూ ఇబ్బంది పడకుండా చర్యలు చేపట్టామని ఏపీ మంత్రి బొత్స సత్యనారాయణ చెప్పారు. బియ్యం ఇచ్చే ప్రతికార్డుకూ రూ.వెయ్యి చొప్పున ఇవ్వాలనేది ప్రభుత్వ ఉద్దేశమన్నారు. తాడేపల్లిలోని వైకాపా కేంద్ర కార్యాలయంలో నిర్వహించిన మీడియా సమావేశంలో ఆయన మాట్లాడారు. రేషన్‌ సరకుల పంపిణీలో ఇబ్బందులను అధిగమించేలా చర్యలు చేపట్టామని బొత్స చెప్పారు.

వేసవి దృష్ట్యా అవసరమైతే రేషన్‌ దుకాణాల వద్ద టెంట్లు ఏర్పాటు చేసేలా చర్యలు చేపట్టామన్నారు. ఏ ఒక్కరూ ఆకలితో ఇబ్బంది పడే పరిస్థితి రాకూడదని సీఎం జగన్‌ ఆదేశించారని చెప్పారు. అర్హులైన వాళ్లు రేషన్‌కార్డు కావాలని వస్తే వారికి 5 రోజుల్లో మంజూరు చేస్తామని మంత్రి స్పష్టం చేశారు. రాష్ట్ర ప్రభుత్వం ప్రకటించిన రూ.వెయ్యి నగదు సాయం అందని వారికి త్వరగా అందజేస్తామన్నారు.