అవసరమైతే న్యాయపోరాటం చేస్తాం: భట్టి

హైదరాబాద్‌: పోతిరెడ్డిపాడు విషయంలో ప్రభుత్వ చిత్తశుద్ధిపై అనుమానాలున్నాయని.. తెలంగాణ ప్రజల ప్రయోజనాలను పణంగా పెడుతున్నారని సీఎల్పీ నేత భట్టి విక్రమార్క ఆరోపించారు. రాజకీయ ఒప్పందం, ఆర్థిక లావాదేవీల కోసం ప్రయోజనాలను తాకట్టు పెడుతున్నారంటూ విమర్శించారు. హైదరాబాద్‌లో ఆయన మీడియాతో మాట్లాడారు. ఏపీ ప్రభుత్వం పోతిరెడ్డిపాడు సామర్థ్యం పెంచుతుంటే ప్రభుత్వం ఏం చేస్తుందని భట్టి ప్రశ్నించారు. తెలంగాణ సాధించుకున్నదే నీళ్ల కోసమని.. అలాంటి తెలంగాణకు నీళ్లు లేకుండా తరలిస్తుంటే ప్రభుత్వం ఏం చేస్తోందని నిలదీశారు. పోతిరెడ్డిపాడు ప్రాజెక్టు విషయంలో రెండు రాష్ట్రాల ప్రయోజనాలు ముడిపడి ఉన్నాయన్నారు. ఈ విషయంలో అవసరమైతే న్యాయపోరాటం చేస్తామని చెప్పారు. సొంత ప్రయోజనాల  కోసం తాకట్టుపెడితే ఊరుకునేది లేదని భట్టి హెచ్చరించారు.