Raghurama: వివేకాను చంపించిన కట్టప్ప ఎవరో?

వైకాపా ఎంపీ రఘురామకృష్ణరాజు

ఈనాడు, దిల్లీ: ‘బాహుబలిని కట్టప్ప ఎందుకు చంపాడో తెలియడానికి రెండేళ్లు పట్టింది. బాహుబలి వంటి వివేకానందరెడ్డిని చంపించిన కట్టప్ప ఎవరో మూడేళ్లయినా తేలడం లేదు. అది ఎవరో తేలాలి’ అని వైకాపా ఎంపీ రఘురామకృష్ణరాజు అన్నారు. దిల్లీలో గురువారం ఆయన విలేకర్లతో మాట్లాడారు. రూ.40 కోట్లు ఇచ్చి వివేకానందరెడ్డిని హత్య చేయించే స్థోమత కడప జిల్లాలో ఎవరికి ఉందో సీబీఐ విచారణలో తేలుతుందన్నారు.

ఏపీ పరిశ్రమల శాఖ మంత్రి గౌతమ్‌రెడ్డి దుబాయ్‌లో పది మందికి కోట్లు వేసి సమావేశం పెట్టారని.. దాన్ని చూపి రూ.3 వేల కోట్లు పెట్టుబడులు వచ్చాయని సామాజిక మాధ్యమాల్లో తమ పార్టీవారు ప్రచారం చేస్తున్నారని రఘురామ ఎద్దేవా చేశారు. కేంద్ర మంత్రి నితిన్‌ గడ్కరీ చేసిన శంకుస్థాపన శిలాఫలకాల్లో ఎంపీలందరి పేర్లు వేసి తన పేరు వేయలేదని, దీనిపై లోక్‌సభ సభాపతికి, గడ్కరీకి లేఖలు రాయనున్నట్లు చెప్పారు. నియామకాలు చేపట్టని ఏపీపీఎస్సీకి ఛైర్మన్‌గా గౌతమ్‌ సవాంగ్‌ చేసేదేమిటని ఆయన ప్రశ్నించారు.