Janasena: ‘జగన్‌కు ఊడిగం చేసుకో.. కాపుల ఊసు నీకెందుకు?’

మంత్రి అంబటిపై జనసేన నాయకుడు వెంకటేశ్వరరావు ధ్వజం

సత్తెనపల్లి, న్యూస్‌టుడే: ‘మంత్రి అంబటి రాంబాబుపై మా పార్టీ అధినేత పవన్‌ కల్యాణ్‌, బిడ్డను పోగొట్టుకున్న అభాగ్యురాలు చేసిన ఆరోపణలు నిజమని ప్రపంచమంతా నమ్మింది. వాటిపై ఆయన మాత్రం వక్రభాష్యం చెబుతున్నారు’అని జనసేన పార్టీ ఉమ్మడి గుంటూరు జిల్లా అధ్యక్షుడు గాదె వెంకటేశ్వరరావు మండిపడ్డారు. పల్నాడు జిల్లా సత్తెనపల్లిలో బుధవారం ఆయన విలేకరులతో మాట్లాడారు. ‘సత్తెనపల్లి నియోజకవర్గంలో చోటుచేసుకుంటున్న అవినీతి, అసాంఘిక కార్యక్రమాలపై జనసేన ప్రశ్నిస్తుంటే ఏం చేయాలో తెలియక పవన్‌ కల్యాణ్‌పై మంత్రి అంబటి అసందర్భంగా విమర్శలు చేస్తున్నారు. జగన్‌కు ఊడిగం చేసుకోవాల్సిందే అంటున్నావు. చేసుకో.. కాపుల ఊసు నీకెందుకు. ప్రతిసారీ పవన్‌ కల్యాణ్‌ విషయంలో నువ్వెందుకు గోక్కుంటున్నావు. సత్తెనపల్లిలో ఏం అభివృద్ధి చేశావో చెప్పు. అంబటి చెప్పిన చోటుకు ఆధారాలతో సహా వచ్చి అవినీతి నిరూపించేందుకు జనసేన సిద్ధంగా ఉంది’ అని ధ్వజమెత్తారు.