వైకాపా పాలనపై పది వేల ఛార్జిషీట్లు

భాజపా రాష్ట్రశాఖ ప్రధాన కార్యదర్శి విష్ణువర్థన్‌రెడ్డి

ఈనాడు, అమరావతి: వచ్చే మార్చిలో ప్రజాపోరు-2 కార్యక్రమం కింద రాష్ట్ర వ్యాప్తంగా 50 లక్షల ఇళ్లను సందర్శించి రాష్ట్రంలో వైకాపా ప్రభుత్వ ప్రజా వ్యతిరేక విధానాలపై ప్రజలను చైతన్యవంతులను చేసి, పది వేల ఛార్జిషీట్లు రూపొందిస్తామని భాజపా రాష్ట్ర శాఖ ప్రధాన కార్యదర్శి విష్ణువర్థన్‌రెడ్డి వెల్లడించారు. పార్టీ కార్యాలయంలో ఆయన బుధవారం విలేకర్లతో మాట్లాడుతూ 2024 ఎన్నికలే లక్ష్యంగా భాజపా 400 రోజుల ప్రణాళికను రూపొందించినట్లు తెలిపారు. ఒకరిద్దరు భాజపా నేతలను చేర్చుకోవడానికి తెదేపా, వైకాపాలు అనైతిక రాజకీయాలకు పాల్పడుతున్నాయని విమర్శించారు. ముందస్తు అనుమతులతోనే భీమవరంలో జరిగిన కార్యవర్గ సమావేశానికి పలువురు సీనియర్‌ నేతలు హాజరు కాలేదని తెలిపారు. భాజపా రాష్ట్ర అధ్యక్షుడు సోము వీర్రాజుపై ఉద్దేశపూర్వకంగా దుష్ప్రచారం జరుగుతోందని విష్ణువర్థన్‌రెడ్డి పేర్కొన్నారు.