Andhra News: ‘పెద్దిరెడ్డిపై పోటీకి చంద్రబాబు అవసరం లేదు.. నేను చాలు’

పారిశ్రామికవేత్త రామచంద్ర యాదవ్‌

పుంగనూరు, న్యూస్‌టుడే: ‘రాష్ట్రంలో... ముఖ్యంగా చిత్తూరు జిల్లాలో వైకాపా ఆగడాలు పెచ్చుమీరాయి. పుంగనూరు నియోజకవర్గంలో మంత్రి పెద్దిరెడ్ది రామచంద్రారెడ్డి అండదండలతో దౌర్జన్యాలు పెరిగాయి. పుంగనూరులో పెద్దిరెడ్డిపై పోటీ చేస్తా. ఆయన మీద ప్రజలు వ్యతిరేకంగా ఉన్నారు. రాబోయే ఎన్నికల్లో నా గెలుపు ఖాయం’ అని పారిశ్రామికవేత్త రామచంద్ర యాదవ్‌ స్పష్టం చేశారు. కేంద్ర ప్రభుత్వం వై ప్లస్‌ భద్రత కల్పించాక తొలిసారి గురువారం ఆయన చిత్తూరు జిల్లా పుంగనూరులోని తన నివాసంలో మీడియాతో మాట్లాడారు. ‘వైకాపా నాయకుల ప్రోత్సాహం, కొందరు పోలీసుల సహకారంతో నా కార్యక్రమాలను అడ్డుకోవడం, ఇంటిపై దాడి చేయడం వంటి ఘటనలను కేంద్ర హోం మంత్రి అమిత్‌ షాకు ఇటీవల వివరించా. ఆయన స్పందించి నాకు వై ప్లస్‌ భద్రత కల్పించినందుకు ధన్యవాదాలు. నన్ను హతమార్చేందుకు వైకాపా నేతలు చేసిన దాడి కేసులో పురోగతి లేదు. దీనిపై సీబీఐతో దర్యాప్తు చేయించాలి. నేను తెదేపా ప్రధాన కార్యదర్శి లోకేశ్‌ను కలవడం లేదు. ఏ పార్టీ తరఫున పోటీ చేస్తాననేది నెల రోజుల్లో తేలుతుంది. పెద్దిరెడ్డిపై పోటీకి నేను చాలు. తెదేపా అధినేత చంద్రబాబు అవసరం లేదు. నియోజకవర్గంలో గ్రామగ్రామాన పర్యటించి ప్రభుత్వ వైఫల్యాలను, ప్రజా వ్యతిరేక విధానాలను ప్రజలకు వివరిస్తా. నాకు మద్దతిచ్చే ప్రతి ఒక్కరినీ కాపాడుకుంటా’ అని భరోసా ఇచ్చారు.