2 నుంచి ప్రజాప్రస్థానం పాదయాత్ర పునఃప్రారంభం

మా గొంతు నొక్కేందుకే షరతులతో అనుమతి: షర్మిల

ఈనాడు, హైదరాబాద్‌-చెన్నారావుపేట, న్యూస్‌టుడే: ప్రజల సమస్యలు తెలుసుకునేందుకు తాను చేపట్టిన ప్రజాప్రస్థానం పాదయాత్రను ఫిబ్రవరి 2వ తేదీ నుంచి తిరిగి ప్రారంభించనున్నట్లు వైతెపా అధ్యక్షురాలు వై.ఎస్‌.షర్మిల తెలిపారు. ఈ మేరకు శుక్రవారం ఆమె ఒక ప్రకటన విడుదల చేశారు. శనివారం(ఈ నెల 28) నుంచి పాదయాత్రకు అనుమతి కావాలని కోరగా వరంగల్‌ పోలీసులు నిరాకరించారని తెలిపారు. ఇంతకుముందు పాదయాత్ర నిలిచిన నర్సంపేట నియోజకవర్గం శంకరమ్మతండా నుంచి తిరిగి మొదలుపెడతామని వివరించారు. ‘‘తెలంగాణలో కేసీఆర్‌ పాలనకు మా పాదయాత్ర చరమగీతం పాడుతుంది. ప్రజలు మాకు అడుగడుగునా బ్రహ్మరథం పడుతుంటే కేసీఆర్‌కు భయం పట్టుకుంది. ప్రశ్నించే గొంతును నొక్కాలని చూస్తున్నారు. అందుకే 15 షరతులు విధిస్తూ అనుమతి ఇచ్చారు’’ అని షర్మిల పేర్కొన్నారు.