నందికొట్కూరు ఎమ్మెల్యేపై అసంతృప్తి

మిడుతూరు, న్యూస్‌టుడే: ‘గత ఎన్నికల్లో సీఎంగా జగన్‌ను, ఎమ్మెల్యేగా మిమ్మల్ని కష్టపడి గెలిపించుకున్నందుకు మాకు తగిన శాస్తి జరుగుతోంది’ అని నంద్యాల జిల్లా మిడుతూరు మండలం సుంకేసుల గ్రామస్థులు నందికొట్కూరు నియోజకవర్గ ఎమ్మెల్యే ఆర్థర్‌వద్ద అసంతృప్తిని వెళ్లగక్కారు. ఎమ్మెల్యే శనివారం సుంకేసుల గ్రామంలో ‘గడప గడపకూ మన ప్రభుత్వం’లో పాల్గొన్నారు. ఇంటింటికీ వెళ్లి ప్రభుత్వం అమలు చేస్తున్న సంక్షేమ పథకాల గురించి వివరించారు. వైకాపా కోసం కష్టపడి పని చేసిన వారిని కాదని, ఇతర పార్టీల్లోంచి వచ్చిన వారికే ప్రాధాన్యం ఇస్తున్నారని మహిళలు వాపోయారు. వైకాపా విజయం కోసం కృషి చేసిన తమకు కనీసం ఇంటి స్థలమూ ఇవ్వడం లేదని మరికొందరు నిలదీశారు. అర్హులకు ఇళ్ల స్థలాల్ని ఎందుకు కేటాయించలేదని సచివాలయ సిబ్బందిపై ఎమ్మెల్యే ఆగ్రహం వ్యక్తం చేశారు.