జోడో యాత్రకు భద్రత కల్పించండి

కేంద్ర హోంమంత్రి అమిత్‌షాకు ఖర్గే లేఖ

దిల్లీ: జమ్మూకశ్మీర్‌లో కొనసాగుతున్న భారత్‌ జోడో యాత్రకు భద్రత కల్పించే అంశంలో వ్యక్తిగతంగా జోక్యం చేసుకోవాలని కేంద్ర హోంమంత్రి అమిత్‌ షాకు కాంగ్రెస్‌ పార్టీ అధ్యక్షుడు మల్లికార్జున ఖర్గే శనివారం లేఖ రాశారు. 30వ తేదీన శ్రీనగర్‌లో జరిగే ముగింపు సభకు వివిధ పార్టీల అగ్రనేతలు రానున్నారని.. అప్పటి వరకూ యాత్రకు పూర్తి భద్రత కల్పించేలా అధికారులను ఆదేశించాలని విజ్ఞప్తి చేశారు. రాజకీయ నాయకులకు భద్రత కల్పించడం ప్రభుత్వ బాధ్యత అని ఖర్గే పేర్కొంటూ లేఖను ట్వీట్‌ ద్వారా కూడా వెల్లడించారు. భారత్‌ ఇప్పటికే ఇద్దరు ప్రధానులను, పలువురు నాయకులను కోల్పోయిందని గుర్తుచేస్తూ.. యాత్రలో గట్టి భద్రతకు డిమాండు చేశారు. జమ్మూకశ్మీర్‌ పోలీసులు భద్రతను ఉపసంహరించుకోవడంతో యాత్రను నిలిపివేస్తున్నామని శుక్రవారం మధ్యాహ్నం కాంగ్రెస్‌ ప్రకటించింది.