రక్తపు మరకలను ఎవరు శుభ్రం చేశారో అవినాష్‌రెడ్డి చెప్పాలి

తెదేపా ఎమ్మెల్సీ బీటెక్‌ రవి డిమాండ్‌

ఈనాడు డిజిటల్‌, అమరావతి: మాజీ మంత్రి వైఎస్‌ వివేకానందరెడ్డి హత్య కేసులో కడిగిన ముత్యంలా బయటకు వస్తానని చెబుతున్న అవినాష్‌రెడ్డి.. హత్య జరిగిన స్థలంలో రక్తపు మరకల్ని ఎవరు శుభ్రం చేశారో చెప్పాలని తెదేపా ఎమ్మెల్సీ బీటెక్‌ రవి డిమాండు చేశారు. హత్య జరిగిన నిమిషాల వ్యవధిలోనే ఘటనా స్థలానికి ఎవరు వెళ్లారు? వెళ్లి ఏం చేశారో చెప్పాలని, ప్రతిపక్షంలో ఉండగా వివేకా హత్య కేసును సీబీఐతో విచారణ జరిపించాలని హైకోర్టును కోరి.. అధికారంలోకి వచ్చిన వెంటనే ఎందుకు ఉపసంహరించుకున్నారని ఆదివారం ఓ ప్రకటనలో ఎమ్మెల్సీ బీటెక్‌ రవి ప్రశ్నించారు. ‘వివేకా భౌతిక కాయాన్ని సందర్శించకుండానే బాబాయికి గుండెపోటు వచ్చిందని ఓసారి, చంద్రబాబు చంపేశారని మరోసారి మీడియా ముందుకు వచ్చి అబద్ధాలు చెప్పినప్పుడే వీరి హత్యా రాజకీయాలు బయటపడ్డాయి. సీబీఐ అధికారులు నోటీసులిచ్చిన వెంటనే విచారణకు హాజరు కాకుండా అవినాష్‌రెడ్డి 5 రోజుల సమయం ఎందుకు తీసుకున్నారు? ఈ సమయంలో ఎవరి కాళ్లు, వేళ్లు పట్టుకుని బతిమాలారు.. ఈ 5 రోజుల్లో రాష్ట్రాభివృద్ధి కోసం ఆయన చేసిన కార్యక్రమాలేంటి’ అని బీటెక్‌ రవి నిలదీశారు. ‘ఎంపీ పదవి కోసం అవినాష్‌రెడ్డి వైఎస్‌ కుటుంబంలో కలహాలు సృష్టించిన మాట వాస్తవం కాదా? ఇప్పడు ఏ మొహం పెట్టుకుని ఆయన వైఎస్‌ విజయమ్మను కలిశారో రాష్ట్ర ప్రజలకు సమాధానం చెప్పాలి’ అని డిమాండ్‌ చేశారు.