హామీలను విస్మరించిన భారాస ప్రభుత్వం: కాసాని

ఈనాడు, హైదరాబాద్‌: ఎన్నికల సమయంలో ఇచ్చిన హామీల అమలును తెలంగాణలోని భారాస ప్రభుత్వం విస్మరించిందని తెదేపా రాష్ట్ర అధ్యక్షుడు కాసాని జ్ఞానేశ్వర్‌ విమర్శించారు. ప్రజలకు సంక్షేమ పథకాలు, కార్యక్రమాలు అందించకుండా మోసగిస్తోందని మండిపడ్డారు. గ్రేటర్‌ హైదరాబాద్‌ పరిధిలోని వివిధ పార్టీలకు చెందిన నాయకులు, కార్యకర్తలు ఆదివారం ఇక్కడ కాసాని సమక్షంలో తెదేపాలో చేరారు. ఈ సందర్భంగా ఆయన మాట్లాడుతూ.. భారాస ప్రభుత్వం చెబుతున్న విషయాలకు, చేస్తున్న పనులకు పొంతన లేదన్నారు. తెలంగాణలో ఎక్కడ చూసినా చంద్రబాబు హయాంలో జరిగిన అభివృద్ధి కనిపిస్తుందన్నారు. తెదేపా అధికారంలోకి వస్తేనే రాష్ట్రం మరింత అభివృద్ధి చెందుతుందని, మైనార్టీలు, బడుగు, బలహీన వర్గాలకు అన్ని రంగాల్లో న్యాయం జరుగుతుందన్నారు.