కేటీఆర్‌పై మాట్లాడే స్థాయి అర్వింద్‌కు లేదు: జీవన్‌రెడ్డి

ఈనాడు, హైదరాబాద్‌: ఎప్పుడూ అబద్ధాలు మాట్లాడే నిజామాబాద్‌ ఎంపీ అర్వింద్‌కు మంత్రి కేటీఆర్‌ గురించి మాట్లాడే స్థాయి లేదని పీయూసీ ఛైర్మన్‌, ఆర్మూర్‌ ఎమ్మెల్యే జీవన్‌రెడ్డి విమర్శించారు. భారాస శాసనసభాపక్ష కార్యాలయంలో మంగళవారం ఎమ్మెల్సీలు వి.గంగాధర్‌గౌడ్‌, యెగ్గె మల్లేశంలతో కలిసి విలేకరుల సమావేశంలో జీవన్‌రెడ్డి మాట్లాడారు. అర్వింద్‌ తాగే నీళ్లు కేసీఆర్‌ ఇచ్చినవేననీ, నడిచే రోడ్డు కేసీఆర్‌ వేసిందేనని పేర్కొన్నారు. దావోస్‌లో 52 సమావేశాల్లో పాల్గొని.. రూ.21 వేల కోట్ల పెట్టుబడులు సాధించింది కేటీఆర్‌ కాదా? అని ప్రశ్నించారు. నిజామాబాద్‌ జిల్లా అభివృద్ధిపై చర్చకు తాను ఎక్కడికి రావడానికైనా సిద్ధమని అర్వింద్‌కు సవాల్‌ విసిరారు. కేంద్రంలో భాజపా అధికారంలోకి వచ్చే ప్రసక్తే లేదనీ.. కాబోయే ప్రధాని కేసీఆరేనని తెలిపారు.