రాజ్యాంగాన్ని అవమానిస్తున్న కేసీఆర్‌

కేంద్ర పర్యాటక శాఖ మంత్రి కిషన్‌రెడ్డి ధ్వజం

ఈనాడు, దిల్లీ: ముఖ్యమంత్రి కేసీఆర్‌ రాజ్యాంగాన్ని పదేపదే అవమానిస్తున్నారని కేంద్ర పర్యాటక శాఖ మంత్రి కిషన్‌రెడ్డి విమర్శించారు. దిల్లీలో మంగళవారం ఆయన విలేకరులతో మాట్లాడారు. రాష్ట్రపతి ప్రసంగాన్ని బహిష్కరించాలని భారాస ఎంపీలకు కేసీఆర్‌ సూచించడం రాజ్యాంగానికి, రాజ్యాంగబద్ధమైన పదవులకు ఆయన ఇచ్చే గౌరవాన్ని తెలియజేస్తోందన్నారు. ఎమ్మెల్యేలు, ఎంపీలనే కాదు గవర్నర్లను, ప్రధానమంత్రిని.. రాష్ట్రపతిని గౌరవించడం కూడా కేసీఆర్‌కు రాదని మండిపడ్డారు. రాజీనామాకు సిద్ధమంటూ భారాస నేతలు చెప్పే మాటలు చూసి తెలంగాణ ప్రజలు నవ్వుకుంటున్నారని ఆయన ఎద్దేవా చేశారు. భారాస ప్రజాప్రతినిధులు రాజీనామా చేయాల్సిన పని లేకుండానే మూడు, నాలుగు నెలల్లో ఎన్నికలు రాగానే వారిని ఇంటికి పంపేందుకు ప్రజలు సిద్ధంగా ఉన్నారన్నారు.