రాష్ట్రపతి ప్రసంగం బహిష్కరణ సిగ్గుచేటు

భాజపా అధ్యక్షుడు బండి సంజయ్‌  

ఈనాడు, దిల్లీ: రాష్ట్రపతి ప్రసంగాన్ని భారాస బహిష్కరించడం సిగ్గుచేటని భాజపా రాష్ట్ర అధ్యక్షుడు బండి సంజయ్‌ దుయ్యబట్టారు. దిల్లీ విజయ్‌చౌక్‌లో పార్టీ ఎంపీలు సోయం బాపురావు, ధర్మపురి అర్వింద్‌లతో కలిసి మంగళవారం ఆయన విలేకరులతో మాట్లాడారు. ఈ విషయంలో భారాస పైకి చెబుతున్నది ఒకటైతే.. లోపలున్న ఉద్దేశం వేరన్నారు. దళిత, గిరిజన, ఆదివాసీ, బలహీనవర్గాల మహిళలంటే ముఖ్యమంత్రి కేసీఆర్‌కు ద్వేషమని ఆరోపించారు. గతంలో మైనారిటీ, ఎస్సీ వ్యక్తులను రాష్ట్రపతులను చేసిన భాజపా.. ఈ సారి ఆదివాసీ మహిళను అభ్యర్థిగా ప్రతిపాదిస్తే భారాస ఓడించేందుకు యత్నించిందని విమర్శించారు. బలహీనవర్గాలకు చెందిన మహిళా గవర్నర్‌ను అడుగడుగునా అవమానిస్తున్నారని.. కోర్టు గట్టిగా చెప్పాకే ఆమెను శాసనసభకు పిలిచారని పేర్కొన్నారు. ఈ విషయంలో దళిత, గిరిజన, ఆదివాసీ, బలహీనవర్గాల మహిళలకు కేసీఆర్‌ క్షమాపణ చెప్పాలని డిమాండ్‌ చేశారు. ఎన్నికల్లో ఓడిపోగానే కేటీఆర్‌, కవిత విదేశాలకు వెళ్లిపోతారని.. ఎంపీ అర్వింద్‌ ఆరోపించారు.

భారాస నేతలకు మహిళలంటే చిన్న చూపని.. వారు ఏ స్థాయిలో ఉన్నా అవమానించడమే పనిగా పెట్టుకున్నారని భాజపా ఓబీసీ మోర్చా జాతీయ అధ్యక్షుడు లక్ష్మణ్‌ విమర్శించారు. ఓ ఆదివాసీ మహిళ రాష్ట్రపతిగా ఎన్నికై చేస్తున్న తొలి ప్రసంగాన్ని బహిష్కరించడం ఆ వర్గం మహిళలను అవమానించడమేనన్నారు.