11న రాష్ట్రానికి అమిత్‌ షా.. నెలాఖరుకు నడ్డా

ఖరారు కావాల్సిన ప్రధాని పర్యటన

ఈనాడు, హైదరాబాద్‌: ఈ నెలలోనే భాజపా అగ్రనేతలు రాష్ట్రానికి రానున్నారు. కేంద్ర హోంశాఖ మంత్రి అమిత్‌ షా 11న, నెలాఖరుకు భాజపా జాతీయ అధ్యక్షుడు జె.పి.నడ్డా రాష్ట్రానికి వస్తారని పార్టీ ముఖ్యనేతలు తెలిపారు. ప్రధాని మోదీ ఈ నెల 13న వస్తారని తెలుస్తోందని అయితే పార్లమెంట్‌ సమావేశాల నేపథ్యంలో పర్యటనలో మార్పులు ఉంటాయని భావిస్తున్నామని వివరించారు. అమిత్‌షా, నడ్డా పర్యటనలు ఖరారైనట్లే అని వారు స్పష్టం చేశారు. 8 ఏళ్ల ఎన్డీయే పాలనను, కేంద్ర పథకాలను ప్రజల్లోకి తీసుకెళ్లడమే లక్ష్యంగా పార్లమెంట్‌ నియోజకవర్గాల పరిధిలో పార్లమెంట్‌ ప్రవాస్‌ యోజన కార్యక్రమాన్ని భాజపా నిర్వహిస్తోంది. ఇందులో భాగంగా అమిత్‌ షా రాష్ట్రానికి వస్తున్నారని తెలిసింది.