సీఎం కేసీఆర్‌తో అమిత్‌జోగి భేటీ

ఈనాడు, హైదరాబాద్‌: ఛత్తీస్‌గఢ్‌ మాజీ ముఖ్యమంత్రి అజిత్‌జోగి తనయుడు, జనతా కాంగ్రెస్‌ అధ్యక్షుడు అమిత్‌జోగి బుధవారం సీఎం కేసీఆర్‌తో భేటీ అయ్యారు. పార్టీ ముఖ్య నాయకులతో కలిసి ప్రగతి భవన్‌కు వచ్చిన ఆయన తెలంగాణ అభివృద్ధి, దేశ రాజకీయ పరిణామాలు, జాతీయ వ్యవహారాలపై సుదీర్ఘంగా చర్చించారు. భారాస విధి విధానాలను కేసీఆర్‌ను అడిగి తెలుసుకున్నారు. జాతీయ రాజకీయాల్లో ప్రత్యామ్నాయ రాజకీయ శక్తుల అవసరం ఉందని అభిప్రాయపడిన అమిత్‌ జోగి..భారాస పేరిట జాతీయ పార్టీని స్థాపించడాన్ని ఆహ్వానించారు. ఈ సందర్భంగా అజిత్‌జోగి ఆటోబయోగ్రఫీ పుస్తకాన్ని కేసీఆర్‌కు బహూకరించారు. జనతా కాంగ్రెస్‌ పార్టీకి ముగ్గురు ఎమ్మెల్యేలున్నారు.