Balineni: నిరూపించలేకపోతే పోటీనుంచి తప్పుకొంటారా?: కోటంరెడ్డికి బాలినేని సవాల్

ఒంగోలు నగరం, న్యూస్‌టుడే: కోటంరెడ్డి శ్రీధర్‌రెడ్డి విడుదల చేసింది ఆడియో కాల్‌ రికార్డని వైకాపా ప్రాంతీయ సమన్వయకర్త, మాజీమంత్రి బాలినేని శ్రీనివాసరెడ్డి అన్నారు. ఒంగోలులో ఆయన బుధవారం మీడియాతో మాట్లాడారు. శ్రీధర్‌రెడ్డి చెప్పినట్టు అది ఏమాత్రం ట్యాపింగ్‌ కాదని.. కేవలం కాల్‌ రికార్డేనని తాను నిరూపిస్తానని, లేకపోతే వచ్చే ఎన్నికల్లో పోటీ నుంచి తప్పుకొంటానని చెప్పారు. ఒకవేళ ట్యాపింగ్‌ అని నిరూపించలేకపోతే కోటంరెడ్డి తప్పుకొంటారా అని సవాల్‌ విసిరారు. ఇంటెలిజెన్స్‌ చీఫ్‌ ఆంజనేయులు బెదిరించారని చెప్పడం అవాస్తవమన్నారు. కోటంరెడ్డికి పార్టీలో ఉండటం ఇష్టం లేకపోతే వెళ్లిపోవచ్చని.. మంత్రి పదవి ఇవ్వలేదని ఇలా చేయడం సరికాదన్నారు. వెంకటగిరి ఎమ్మెల్యే ఆనం రామనారాయణరెడ్డికి భద్రత తగ్గించారనడంలోనూ వాస్తవం లేదని చెప్పారు.