Bhuma Akhila priya: తెదేపాలో చేరేందుకు శిల్పా కుటుంబం మంతనాలు: అఖిలప్రియ

నంద్యాల గ్రామీణం, న్యూస్‌టుడే: తెదేపాలో చేరేందుకు నంద్యాల ఎమ్మెల్యే శిల్పా కుటుంబం మంతనాలు సాగిస్తోందని ఆ పార్టీ రాష్ట్ర ప్రధానకార్యదర్శి, మాజీ మంత్రి భూమా అఖిలప్రియ అన్నారు. నంద్యాలలో గురువారం ఆమె విలేకర్లతో మాట్లాడారు. మార్కెట్‌ యార్డులో భూమా కుటుంబం అరాచకాలను బయటపెడతానన్న ఎమ్మెల్యే ఎందుకు మిన్నకున్నారని ప్రశ్నించారు. ఈ నెల 4వ తేదీ సాయంత్రం 4 గంటలకు అన్ని ఆధారాలతో గాంధీచౌక్‌ వద్ద చర్చకు రావాలని ఎమ్మెల్యేకు సవాలు విసిరారు. పురపాలికలో ఎస్సీ, మైనార్టీ కౌన్సిలర్లను గొర్రెలుగా సంబోధించిన కౌన్సిలర్‌ నాగినిరెడ్డి బహిరంగ క్షమాపణ చెప్పాలని డిమాండు చేశారు. శిల్పా కుటుంబం తెదేపా పెద్దలతో టచ్‌లో ఉంటూనే తమ పార్టీపై బురదచల్లే ప్రయత్నాలు మానుకోవాలన్నారు. కౌన్సిలర్‌ జైనాబీ మాట్లాడుతూ కౌన్సిలర్‌ నాగినిరెడ్డి క్షమాపణ చెప్పాలని డిమాండు చేశారు.