మీరు ఓ విజనరీ.. మీతోనే అమరావతి అభివృద్ధి

చంద్రబాబుతో సెల్ఫీ వీడియోలో వైకాపా నేత మీరావలి

పెదకూరపాడు, న్యూస్‌టుడే: ‘నేను వైకాపా వీరాభిమానిని. కాని, చంద్రబాబునాయుడు విజన్‌ నచ్చుతుంది. ఆయనో దార్శనిక నేత. అమరావతి కోసం ఎనలేని కృషి చేశారు’ అంటూ పల్నాడు జిల్లా క్రోసూరు మండలం ఊటుకూరుకు చెందిన వైకాపా రాష్ట్ర యువజన ప్రధాన కార్యదర్శి మీరావలి చేసిన వ్యాఖ్యలు శనివారం సామాజిక మాధ్యమాల్లో వైరల్‌గా మారాయి. శుక్రవారం రాత్రి చంద్రబాబు గన్నవరం నుంచి హైదరాబాద్‌కు విమానంలో పయనమయ్యారు. మీరావలి తోటి ప్రయాణికుడిగా పరిచయం చేసుకుని, ‘నేను వైకాపా ఆవిర్భావం నుంచి పార్టీలో కీలకంగా ఉన్నా. రాజధానిగా అమరావతే ఉండాలి. మీలాంటి వ్యక్తి మాకు కావాలి. జై చంద్రబాబు.. జై అమరావతి’ అంటూ నినదిస్తూ చంద్రబాబుతో సెల్ఫీ వీడియో తీసుకున్నారు. అభివృద్ధిని కాంక్షించే మీలాంటి యువత ముందుకు రావాలంటూ చంద్రబాబు అతనికి సూచించారు. ఈ వీడియోను మీరావలి సామాజిక మాధ్యమాల్లో పోస్టు చేశారు. ఇది పార్టీకి నష్టం కలిగించేలా ఉందంటూ మీరావలిని విమర్శిస్తూ వైకాపా శ్రేణులు స్పందించాయి.