జాతీయవాదం పేరిట దేశం పరువు తీస్తున్నారు

అదానీ ఉదంతంపై ట్విటర్‌లో మంత్రి కేటీఆర్‌

ఈనాడు, హైదరాబాద్‌: అదానీ ఉదంతంలో కుహనా జాతీయవాదం, ఆశ్రితపక్షపాత ధోరణితో ప్రపంచవ్యాప్తంగా భారతదేశ విశ్వసనీయతను దెబ్బతీస్తున్నారని భారాస రాష్ట్ర కార్యనిర్వాహక అధ్యక్షుడు, మంత్రి కేటీ రామారావు శనివారం ట్విటర్‌లో ధ్వజమెత్తారు. జరిగిన కుంభకోణంపై విచారణకు ఇదే సరైన సమయమని, ఇలాంటి వాటిని ఆపేందుకు ఇకనైనా చర్యలు చేపట్టాలన్నారు. ప్రస్తుతం ప్రపంచ కుబేరుల్లో ఒకరిగా పతాక శీర్షికల్లో ఉన్న అదానీ 2013లో ఎవరికీ తెలియదని, నరేంద్రమోదీ 2013 నవంబరు 7న సంపన్నుల గురించి చేసిన ప్రస్తావనలో ఆయన పేరు కూడా ఎత్తలేదని పేర్కొన్నారు. ఆశ్రిత పక్షపాతంతో తొమ్మిదేళ్లలో ఏ స్థాయికి చేరవచ్చో అదానీ ఉదంతం నిరూపిస్తోందని తెలిపారు.