జగన్‌ గ్రాఫ్‌ పడిపోతోంది.. ఏపీ వెళ్లి పాదయాత్ర చేసుకో: షర్మిలకు కడియం సూచన

స్టేషన్‌ఘన్‌పూర్‌, న్యూస్‌టుడే: ‘ఆంధ్రప్రదేశ్‌లో రోజురోజుకు ముఖ్యమంత్రి జగన్‌ గ్రాఫ్‌ పడిపోతోంది. షర్మిల అక్కడ పాదయాత్ర చేసుకుంటే మంచి అవకాశం వస్తుంది’ అని భారాస ఎమ్మెల్సీ కడియం శ్రీహరి వ్యాఖ్యానించారు. తెలంగాణ బడ్జెట్ గురించి వైతెపా అధ్యక్షురాలు వైఎస్‌ షర్మిల మాట్లాడటం బాధాకరమని పేర్కొన్నారు. సమైక్యాంధ్ర నినాదంతో ఊరూరా తిరిగిన వ్యక్తి షర్మిల అని మండిపడ్డారు. జనగామ జిల్లా స్టేషన్‌ఘన్‌పూర్‌లో మంగళవారం ఏర్పాటు చేసిన విలేకరుల సమావేశంలో శ్రీహరి మాట్లాడారు. ‘‘షర్మిలా.. నీకు ఏమైనా రాజకీయ పరిజ్ఞానం ఉంటే ఆంధ్రకు వెళ్లి పాదయాత్రలు చేసుకో. అక్కడి ప్రజలతో మొరపెట్టుకో. రేపోమాపో నీ అన్న జగన్‌ సీబీఐ కేసులోనో లేక మీ బాబాయి వివేకా హత్య కేసులోనో జైలుకు పోతే.. మీకు ఆంధ్రలో మంచి అవకాశం వస్తుంది. అనవసరంగా తెలంగాణలో పాదయాత్రల పేరిట సమయం, శక్తి, వనరులను వృథా చేసుకోవద్దు’’ అని కడియం వ్యాఖ్యానించారు.