బాలాసాహెబ్‌ పేరు ఎత్తకండి.. దమ్ముంటే మోదీ పేరుతో ఓట్లడగండి: భాజపాకు ఉద్ధవ్‌ సవాల్‌

ఖేడ్‌ (రత్నగిరి): తన తండ్రి బాలాసాహెబ్‌ ఠాక్రే పేరు ఎత్తకుండా మహారాష్ట్రలో ఓట్లడిగే సాహసం భాజపా చేయగలదా అని ఉద్ధవ్‌ ఠాక్రే ప్రశ్నించారు. దమ్ముంటే మోదీ పేరుతో ఓట్లడిగి నెగ్గాలని సవాల్‌ విసిరారు. ఆదివారం రత్నగిరి జిల్లాలోని ఖేడ్‌లో నిర్వహించిన సభలో ఆయన ఈ మేరకు ప్రసంగించారు. అందరూ భాజపాను అంటరాని పార్టీగా చూసే సమయంలో తన తండ్రి ఆ పార్టీని అక్కున చేర్చుకున్నారని ఠాక్రే చెప్పారు. మహారాష్ట్ర సీఎం ఏక్‌నాథ్‌ శిందే నేతృత్వంలోని తిరుగుబాటు వర్గానికి పార్టీ పేరు, గుర్తును కేటాయించిన కేంద్ర ఎన్నికల సంఘంపైనా ఠాక్రే భగ్గుమన్నారు. అధికార పార్టీకి ఎన్నికల సంఘం గులాంగిరీ చేస్తోందని ఘాటుగా విమర్శించారు.