కొందరు దేశాన్ని అప్రతిష్ఠపాలు చేస్తున్నారు

బ్రిటన్‌లో రాహుల్‌ వ్యాఖ్యలపై యూపీ సీఎం ఆదిత్యనాథ్‌

లఖ్‌నవూ: అంతర్జాతీయ వేదికలపై దేశ ప్రతిష్ఠ పెరుగుతున్న తరుణంలో కొందరు విదేశీ గడ్డ మీద దేశంపై విమర్శలు గుప్పిస్తున్నారని ఉత్తర్‌ప్రదేశ్‌ ముఖ్యమంత్రి యోగి ఆదిత్యనాథ్‌ ఆక్షేపించారు. బ్రిటన్‌లో ఇటీవల కాంగ్రెస్‌ అగ్రనేత రాహుల్‌ గాంధీ చేసిన వ్యాఖ్యల నేపథ్యంలో ఆయన పేరును ప్రస్తావించకుండా యోగి ఇలా స్పందించారు. అదే వ్యక్తులు తాము అధికారంలో ఉన్నప్పుడు ప్రజాస్వామ్యం గొంతునొక్కారని ఆరోపించారు. గోరఖ్‌పుర్‌లో జరిగిన ఓ కార్యక్రమంలో ఆయన ప్రసంగిస్తూ ప్రపంచంలో మన దేశానికి ప్రధానమంత్రి నరేంద్ర మోదీ కీర్తిని తీసుకొస్తుంటే కొంతమంది దేశాన్ని అపఖ్యాతి పాల్జేస్తున్నారని విమర్శించారు.

రాహుల్‌ ఓటమిని మూటగట్టుకుంటారు : స్మృతి ఇరానీ

అమేఠీ: కాంగ్రెస్‌ అగ్రనేత రాహుల్‌ గాంధీ 2024లో జరిగే లోక్‌సభ ఎన్నికల్లో ఓటమిని మూటగట్టుకుంటారని కేంద్ర మహిళ, శిశు అభివృద్ధి శాఖ మంత్రి స్మృతి ఇరానీ పేర్కొన్నారు. ఉత్తర్‌ప్రదేశ్‌లోని అమేఠీకి చెందిన జగ్దీశ్‌పుర్‌లో పాన్‌టూన్‌ వంతెనను ప్రారంభించిన అనంతరం ఆమె ప్రసంగిస్తూ అమేఠీ లోక్‌సభ స్థానం ప్రజల మద్దతుతో గెలిచిన గాంధీ కుటుంబం ఆ తరువాత వారిని మరిచిపోయేవారని విమర్శించారు.