దేశ వ్యతిరేక ‘టూల్‌కిట్‌’లో రాహుల్‌ శాశ్వత సభ్యుడు!

భాజపా అధ్యక్షుడు నడ్డా ధ్వజం

దిల్లీ: మన దేశంలో బలహీనమైన ప్రభుత్వం ఉంటే తమ ప్రయోజనాలను నెరవేర్చుకోవాలని చూసే ‘భారత వ్యతిరేక టూల్‌కిట్‌’ బృందంలో కాంగ్రెస్‌ అగ్రనేత రాహుల్‌ గాంధీ శాశ్వత సభ్యుడయ్యారని భాజపా అధ్యక్షుడు జె.పి.నడ్డా తీవ్రస్థాయిలో ధ్వజమెత్తారు. భారతదేశ వ్యతిరేకులైన జార్జి సోరెస్‌ వంటి వ్యక్తుల భాషలో రాహుల్‌ మాట్లాడుతున్నారని మండిపడ్డారు. మన దేశ అంతర్గత వ్యవహారాల్లో జోక్యం చేసుకోవాలని బ్రిటన్‌ పర్యటన సమయంలో విదేశాలకు విజ్ఞప్తి చేయడం ద్వారా కాంగ్రెస్‌ అగ్రనేత తీవ్ర నేరానికి పాల్పడ్డారని, దేశ ప్రజలకు క్షమాపణలు చెప్పాల్సిందేనని శుక్రవారం ఒక ప్రకటనలో నడ్డా డిమాండ్‌ చేశారు. భారత ప్రజాస్వామ్యం ప్రమాదంలో ఉందని విదేశీ గడ్డపై చెప్పడం సిగ్గుచేటని అన్నారు. దేశాన్ని, ప్రజలను, పార్లమెంటును, ప్రజాస్వామ్యబద్ధంగా ఎన్నికైన ప్రభుత్వాన్ని రాహుల్‌ అవమానించారని పేర్కొన్నారు.