పట్టభద్రుల ఎమ్మెల్సీ ఎన్నికల్లో తెదేపా క్లీన్‌స్వీప్‌

పశ్చిమ రాయలసీమలో హోరాహోరీగా పోరాడి గెలుపు
రామగోపాల్‌రెడ్డి గెలిచినా డిక్లరేషన్‌ ఇవ్వకపోవడంపై తెదేపా నిరసన
ఉత్తరాంధ్ర, తూర్పు రాయలసీమల్లో ఏకపక్ష విజయం
మూడుచోట్ల మొదటి ప్రాధాన్యత ఓట్లలో 43.63% దక్కించుకున్న తెదేపా
వైకాపాకు 35.70% ఓట్లు

ఈనాడు, అమరావతి: పట్టభద్రుల ఎమ్మెల్సీ ఎన్నికల్లో తెదేపా క్లీన్‌స్వీప్‌ చేసింది. ఎన్నికలు జరిగిన మూడు నియోజకవర్గాల్లోనూ విజయదుందుభి మోగించింది. ఉత్తరాంధ్ర, తూర్పు రాయలసీమ నియోజకవర్గాల్లో స్పష్టమైన ఆధిక్యతతో ఏకపక్షంగా గెలిచింది. పశ్చిమ రాయలసీమలో హోరాహోరీగా పోరాడి విజయం దక్కించుకుంది. ఈ నియోజకవర్గంలో మొదటి ప్రాధాన్యత ఓట్లు తెదేపా కంటే వైకాపా అభ్యర్థికే ఎక్కువగా వచ్చాయి. రెండో ప్రాధాన్యత ఓట్ల లెక్కింపు మొదలయ్యాక తెదేపా అభ్యర్థి ఆధిక్యంలోకి వచ్చారు. ఆ ఆధిక్యం చివరివరకూ కొనసాగింది. దీంతో తెదేపా అభ్యర్థి భూమిరెడ్డి రామగోపాల్‌రెడ్డి.. వైకాపా అభ్యర్థి వెన్నపూస రవీంద్రారెడ్డిపై 7,543 ఓట్ల ఆధిక్యంతో శనివారం రాత్రి విజయం సాధించారు. ఈ మూడు నియోజకవర్గాల పరిధిలో మొత్తం చెల్లిన ఓట్లలో.. తెదేపా అభ్యర్థులకు 43.63% మొదటి ప్రాధాన్యత ఓట్లు దక్కాయి. వైకాపా అభ్యర్థులకు 35.70% ఓట్లు లభించాయి. రెండోస్థానంలో నిలిచిన వైకాపా కంటే 7.93% ఓట్లు తెదేపా అధికంగా సాధించింది. మూడు పట్టభద్రుల నియోజకవర్గాల పరిధిలో 7,16,664 ఓట్లు పోలవ్వగా.. వాటిల్లో 6,63,782 ఓట్లు చెల్లుబాటు అయ్యాయి. వాటిల్లో మొదటి ప్రాధాన్యతకు ఓట్లు తెదేపాకు 2,89,630, వైకాపాకు 2,36,972 వచ్చాయి. ఈ రెండు పార్టీల మధ్య 52,658 ఓట్ల వ్యత్యాసం ఉంది. ఈ మూడు నియోజకవర్గాల పరిధిలోనూ భాజపా అభ్యర్థులు డిపాజిట్లు కోల్పోయారు.

ఉత్తరాంధ్రలో 14.40%.. తూర్పు రాయలసీమలో 10.98% అధికం

* ఉత్తరాంధ్రలో వైకాపా అభ్యర్థి సీతంరాజు సుధాకర్‌ కంటే తెదేపా అభ్యర్థి వేపాడ చిరంజీవిరావుకు 27,216 మొదటి ప్రాధాన్యత ఓట్లు అధికంగా వచ్చాయి. ఇక్కడ అధికార పార్టీ కంటే తెదేపా 14.40% ఓట్లు అధికంగా సాధించింది.

* తూర్పు రాయలసీమలో వైకాపా అభ్యర్థి పేర్నాటి శ్యాంప్రసాద్‌రెడ్డి కంటే తెదేపా అభ్యర్థి కంచర్ల శ్రీకాంత్‌కు 27,262 మొదటి ప్రాధాన్యత ఓట్లు అధికంగా లభించాయి. ఇక్కడ అధికారపార్టీ కంటే తెదేపా 10.98% ఓట్లు అధికంగా సాధించింది.

* ఈ రెండు నియోజకవర్గాల పరిధిలో మొదటి ప్రాధాన్యత ఓట్లలో వైకాపా కంటే తెదేపా 54,478 ఓట్లు అధికంగా సాధించింది.

* పశ్చిమ రాయలసీమ పరిధిలో మాత్రం తెదేపా అభ్యర్థి కంటే వైకాపా అభ్యర్థి 1,820 మొదటి ప్రాధాన్యత ఓట్లు అధికంగా సాధించారు. రెండో ప్రాధాన్యత ఓట్లను కూడా కలిపితే వైకాపా కంటే తెదేపా 7,543 ఓట్లు అధికంగా సాధించింది.

* మూడు నియోజకవర్గాల పరిధిలో చెల్లిన ఓట్లలో పీడీఎఫ్‌కు 13.84%, భాజపాకు 3.70% ఓట్లే దక్కాయి.