దళిత యువకుడిపై దాడి అమానుషం

సీఐ క్షమాపణ చెప్పాలని తెదేపా నిరసన

అమలాపురం పట్టణం, న్యూస్‌టుడే: దళిత యువకుడిని కొట్టిన సీఐ క్షమాపణలు చెప్పాలని శనివారం డా.బీఆర్‌ అంబేడ్కర్‌ కోనసీమ జిల్లా అమలాపురంలో తెదేపా శ్రేణులు నిరసన తెలిపాయి. పట్టభద్రుల ఎమ్మెల్సీ ఎన్నికల్లో విజయం సాధించిన నేపథ్యంలో అమలాపురంలోని గడియారస్తంభం కూడలిలో తెదేపా శనివారం విజయోత్సవాలు నిర్వహించింది. మాజీ ఎమ్మెల్యే ఆనందరావు, తెదేపా రాష్ట్ర కార్యనిర్వాహక కార్యదర్శి మెట్ల రమణబాబు భారీ కేకు కోసి నాయకులు, కార్యకర్తలకు పంచారు. పట్టణ సీఐ డి.దుర్గాశేఖర్‌రెడ్డి ఆధ్వర్యంలో పోలీసులు వచ్చి తెదేపా నాయకులు, కార్యకర్తలను అక్కడి నుంచి పంపించే ప్రయత్నం చేస్తుండగా వాగ్వాదం చోటుచేసుకుంది. ఈ క్రమంలో విజయోత్సవాల్లో బాణసంచా కాల్చుతున్న అల్లవరం మండల తెదేపా కార్యకర్త, దళిత యువకుడైన బుంగా వెంకటేశ్వరరావుపై సీఐ చేయిచేసుకున్నారని తెదేపా నాయకులు నిరసన వ్యక్తం చేశారు. సీఐ క్షమాపణలు చెప్పాలని వర్షంలోనే రహదారిపై బైఠాయించారు. సీఐ, పోలీసులు సర్దిచెప్పి వివరణ ఇవ్వడంతో నిరసన విరమించారు.