మండలిని కుదిపిన ‘డిక్లరేషన్‌’ అంశం

వాయిదా తీర్మానాన్ని ప్రవేశపెట్టిన తెదేపా సభ్యులు
తిరస్కరించిన మండలి ఛైర్మన్‌

ఈనాడు, అమరావతి: పశ్చిమ రాయలసీమ పట్టభద్రుల స్థానం నుంచి ఎమ్మెల్సీగా తెదేపా మద్దతుతో గెలిచిన రామగోపాల్‌రెడ్డికి డిక్లరేషన్‌ ఇవ్వకుండా శనివారం రాత్రి జరిగిన హైడ్రామా అంశం శాసనమండలిని కుదిపేసింది. తెదేపా సభ్యుల నినాదాలతో సభ హోరెత్తింది. వారికి పీడీఎఫ్‌, భాజపా సభ్యులూ మద్దతు తెలిపారు. గందరగోళ పరిస్థితుల్లో ప్రశ్నోత్తరాలను కొనసాగించే అవకాశం లేక మండలి ఛైర్మన్‌ మోషేనురాజు సభను వాయిదా వేశారు. ఆదివారం ఉదయం సభ ప్రారంభమవగానే ‘ఎమ్మెల్సీ ఎన్నికల్లో గెలుపొందిన అభ్యర్థికి డిక్లరేషన్‌ ఎందుకివ్వరు?’ అనే అంశంపై సభలో చర్చించేందుకు అనుమతించాలని తెదేపా ఎమ్మెల్సీలు వాయిదా తీర్మానాన్ని ప్రవేశపెట్టారు. ఇది సభకు సంబంధించిన అంశం కాదని, ఎన్నికల సంఘానికి ఫిర్యాదు చేయాలంటూ వాయిదా తీర్మానాన్ని ఛైర్మన్‌ తిరస్కరించారు. దీనికి నిరసనగా తెదేపా ఎమ్మెల్సీలు  నినదిస్తూ పోడియంలోకి దూసుకొచ్చారు. ‘ఇదేం ప్రజాస్వామ్యం? పిరికిపంద చర్య’ అంటూ నినదించారు.