భాజపా మతోన్మాద విధానాలను తిప్పికొట్టండి

జనచైతన్య యాత్రలో సీపీఎం రాష్ట్ర కార్యదర్శి తమ్మినేని

చర్ల, న్యూస్‌టుడే: దేశంలో భాజపా ప్రభుత్వం అమలు చేస్తున్న మతోన్మాద, కార్పొరేట్‌ విధానాలను ప్రజలంతా ప్రతిఘటించాలని సీపీఎం రాష్ట్ర కార్యదర్శి తమ్మినేని వీరభద్రం పిలుపునిచ్చారు. హనుమకొండలో ఈ నెల 17న ప్రారంభమైన జనచైతన్యయాత్ర ఆదివారం రాత్రి భద్రాద్రి కొత్తగూడెం జిల్లా చర్లకు చేరుకుంది. ఈ సందర్భంగా తమ్మినేని ప్రసంగిస్తూ.. కేంద్రంలో అధికారంలోకి వచ్చిన భాజపా భారత రాజ్యాంగ లౌకిక విలువలకు తూట్లు పొడిచి మనువాద సిద్ధాంతాన్ని అమలు చేస్తోందని విమర్శించారు. ఆదివాసీల ప్రథమ శత్రువు భాజపాను గ్రామాల్లోకి రాకుండా తరిమికొట్టాలని సూచించారు. భాజపా అసలురంగు తెలుసుకున్న కేసీఆర్‌ ఆ పార్టీని ఓడించేందుకు చేస్తున్న పోరాటంలో కమ్యూనిస్టులు కలిసి పనిచేస్తారని, అదే సమయంలో ఆయన చేసే తప్పులను సమర్థించబోమన్నారు.  ఏడు సార్లు గెలిచిన భద్రాచలంలో ఎర్రజెండాను మరోసారి ఎగరేస్తామన్న ధీమా వ్యక్తం చేశారు.