బేగంపేటలో చంద్రబాబుకు ఘన స్వాగతం

బేగంపేట, న్యూస్‌టుడే: ఆంధ్రప్రదేశ్‌ నుంచి సోమవారం రాత్రి హైదరాబాద్‌లోని బేగంపేట విమానాశ్రయానికి చేరుకున్న తెదేపా అధినేత చంద్రబాబునాయుడుకు ఆ పార్టీ నాయకులు, కార్యకర్తలు ఘనస్వాగతం పలికారు. విజయవాడ నుంచి ప్రత్యేక విమానంలో బేగంపేట విమానాశ్రయానికి రాత్రి 9 గంటలకు చంద్రబాబు చేరుకున్నారు. ఏపీలోని 3 పట్టభద్రుల ఎమ్మెల్సీ స్థానాలను తెదేపా దక్కించుకున్న నేపథ్యంలో ఆయనకు... తెలంగాణ తెదేపా అధ్యక్షుడు కాసాని జ్ఞానేశ్వర్‌, నేతలు రావుల చంద్రశేఖర్‌రెడ్డి, కంభంపాటి రామ్మోహన్‌రావు, ముప్పిడి గోపాల్‌లతో పాటు మహిళానేత తులసి తదితరులు ఘనంగా స్వాగతం పలికారు. విమానాశ్రయంలోని వీఐపీ గేటు నుంచి బయటకి వచ్చిన చంద్రబాబు.. కార్యకర్తలకు అభివాదం చేశారు. తనకోసం వేచిఉన్న వారందరినీ పలకరించారు.