నాపై నిందలకు జవాబిచ్చే హక్కుంది

లోక్‌సభలో మాట్లాడే అవకాశమివ్వండి
సభాపతికి రాహుల్‌ లేఖ

దిల్లీ: పార్లమెంటులో సీనియర్‌ మంత్రులు, అధికారపక్ష సభ్యులు తనపైన నిరాధారమైన, అన్యాయమైన నిందలుమోపారని, వాటికి సమాధానమిచ్చే హక్కు తనకుందని కాంగ్రెస్‌ అగ్రనేత రాహుల్‌గాంధీ పేర్కొన్నారు. ఇందుకుగాను లోక్‌సభలో మాట్లాడే అవకాశమివ్వాలని సభాపతి ఓంబిర్లాకు రాసిన లేఖలో కోరారు. పార్లమెంటు నిబంధన 357ను రాహుల్‌ గుర్తు చేస్తూ.. దీని ప్రకారం సభ్యులకు వ్యక్తిగత వివరణ ఇచ్చే అవకాశం ఉంటుందన్నారు. గతంలో ఈ నిబంధన కింద భాజపా ఎంపీ, అప్పటి కేంద్ర మంత్రి రవిశంకర్‌ ప్రసాద్‌ ఆయనపై వచ్చిన ఆరోపణలకు సమాధానమిచ్చారని తెలిపారు. ‘పార్లమెంటు సంప్రదాయాలు, సహజ న్యాయ సూత్రాలను అనుసరించి ఇప్పుడు అటువంటి అవకాశమే నాకివ్వాలని విజ్ఞప్తి చేస్తున్నాను’’ అని రాహుల్‌ గాంధీ విజ్ఞప్తి చేశారు. అధికారంలో ఉన్న వ్యక్తులు మూకుమ్మడిగా చేసే ఆరోపణలకు బదులిచ్చే హక్కు ఇవతలి పక్షానికి కూడా ఉంటుందన్నారు. సాధ్యమైనంత త్వరగా తనకు లోక్‌సభలో మాట్లాడే అవకాశమివ్వాలని స్పీకర్‌ను కోరారు.