‘స్కిల్‌’ స్కాంలో చంద్రబాబు జైలుకు వెళ్లడం ఖాయం

మంత్రి గుడివాడ అమర్‌నాథ్‌

ఈనాడు-విశాఖపట్నం: ‘స్కిల్‌’ స్కాంలో చంద్రబాబు జైలుకు వెళ్లడం ఖాయమని పరిశ్రమలశాఖ మంత్రి గుడివాడ అమర్‌నాథ్‌ అన్నారు. మంగళవారం ఆయన విలేకరుల సమావేశంలో మాట్లాడుతూ ఈ కేసులో ఇప్పటికే 10 మందిని అరెస్టు చేసి న్యాయస్థానంలో ప్రవేశపెట్టిన విషయాన్ని గుర్తు చేశారు. ఈడీ కస్టడీకి పది మందిని అప్పగించారన్నారు. చంద్రబాబు, ఆయన కుమారుడు లోకేశ్‌ ఇక మిగిలి ఉన్నారని చెప్పారు. ఈ స్కాంలో భాగంగా రెండు టోకెన్లు హైదరాబాద్‌ చేరిపోయాయనే సమాచారం విచారణ సమయంలో దొరికిందని, ఆ టోకెన్లు ఎవరి జేబులోకి వెళ్లాయో త్వరలో తేల్చుతారని మంత్రి అమర్‌నాథ్‌ పేర్కొన్నారు. చంద్రబాబుకు అవినీతిలో నోబెల్‌ ఫ్రైజ్‌, యాక్టింగ్‌లో ఆస్కార్‌ ఇవ్వాలని ఎద్దేవా చేశారు. పట్టభద్రుల ఎమ్మెల్సీ ఎన్నికలు ప్రత్యేకంగా ఓ వర్గానికి చెందినవని, అయినప్పటికీ ఓటమికి కారణాలను సమీక్షించి, వారి మనసులు గెలుచుకుంటామన్నారు. త్వరలో జరిగే సాధారణ ఎన్నికల్లో అన్ని వర్గాల ప్రజలు ఓటు హక్కు వినియోగించుకుంటారని, ఆ రోజు చరిత్ర మళ్లీ తిరగరాస్తామని చెప్పారు. అంత సరదా ఉంటే లోకేశ్‌ను పులివెందులలో పోటీ చేయాలని ఒక ప్రశ్నకు సమాధానంగా చెప్పారు.