నైపుణ్యాభివృద్ధి పేరుతో తెదేపా మోసం

మంత్రి మేరుగు నాగార్జున

గోరంట్ల (గుంటూరు), న్యూస్‌టుడే: నైపుణ్యాభివృద్ధి పేరుతో గత ప్రభుత్వం నిరుద్యోగులను నిలువునా మోసం చేసిందని రాష్ట్ర సాంఘిక సంక్షేమ శాఖ మంత్రి మేరుగు నాగార్జున విమర్శించారు. ఇక్కడి వైకాపా కార్యాలయంలో మంగళవారం విలేకర్లతో మాట్లాడుతూ నైపుణ్యాభివృద్ధిని అడ్డుపెట్టుకుని డొల్ల కంపెనీలు పెట్టి కోట్లు దండుకుందని ఆరోపించారు. ‘విచారణ సంస్థలు చంద్రబాబును నిందితుడిగా చూపుతున్నాయి. అసెంబ్లీలో దీనిపై చర్చిస్తుంటే చంద్రబాబు.. వాళ్ల ఎమ్మెల్యేలతో బీసీ స్పీకర్‌, ఎస్సీ శాసనసభ్యులపై దాడి చేయడం అమానుష చర్య. తద్వారా స్కాంను దారి మళ్లించే ప్రయత్నం చేస్తున్నారు...’ అని పేర్కొన్నారు. మాజీ మంత్రి, వైకాపా గుంటూరు జిల్లా అధ్యక్షుడు డొక్కా మాణిక్యవరప్రసాద్‌ మాట్లాడుతూ నైపుణ్యాభివృద్ధి స్కాంపై విచారణ జరిపించి బాధ్యులపై చర్యలు తీసుకోవాలని డిమాండ్‌ చేశారు. ఎమ్మెల్సీ లేళ్ల అప్పిరెడ్డి, ఎమ్మెల్యే ముస్తఫా, నగర మేయర్‌ మనోహర్‌నాయుడు, ఎమ్మెల్సీ అభ్యర్థి చంద్రగిరి ఏసురత్నం తదితరులు పాల్గొన్నారు.