స్ఫూర్తిదాయక ప్రస్థానం

26 ఏళ్ల పిన్న వయసులోనే విజయవాడ మేయర్‌గా పంచుమర్తి అనురాధ ఎన్నిక
ఇప్పుడు ఎమ్మెల్సీగా విజయం

ఈనాడు, అమరావతి: శాసనసభ్యుల కోటా ఎమ్మెల్సీ ఎన్నికల్లో అనూహ్య విజయం సాధించిన తెదేపా అభ్యర్థి పంచుమర్తి అనురాధ రాజకీయ ప్రస్థానం అత్యంత ఆసక్తికరం, స్ఫూర్తిదాయకం. ఎలాంటి రాజకీయ నేపథ్యం లేని, ఉన్నత విద్యావంతుల కుటుంబం నుంచి వచ్చిన ఆమె... 26 సంవత్సరాల పిన్న వయసులోనే ప్రత్యక్ష ఎన్నికల్లో విజయవాడ మేయర్‌గా ఎన్నికై అత్యంత పిన్నవయస్కురాలైన మేయర్‌గా.. లిమ్కా బుక్‌ ఆఫ్‌ రికార్డ్స్‌లో స్థానం సంపాదించారు. తెదేపాలోనే తన రాజకీయ ప్రస్థానం ప్రారంభించిన అనురాధ... 23 సంవత్సరాలుగా పార్టీనే అంటిపెట్టుకుని క్రమశిక్షణగల కార్యకర్తగా, సమర్థతగల నాయకురాలిగా, పార్టీకి విధేయురాలిగా పేరు తెచ్చుకున్నారు. పార్టీలో పలు పదవులు నిర్వహించారు. ప్రస్తుతం తెదేపా రాష్ట్ర ప్రధాన కార్యదర్శిగా ఉన్నారు. 2014లో తెదేపా అధికారంలోకి వచ్చాక... అనురాధ సేవలకు గుర్తింపుగా ఆమెను ఎమ్మెల్సీగా పంపాలని పార్టీ అధినేత చంద్రబాబు నిర్ణయించారు. తనకు కేటాయించిన ఎమ్మెల్సీ స్థానానికి రెండేళ్ల కాలపరిమితే ఉందన్న కారణంతో అప్పట్లో ఆ పదవి తీసుకునేందుకు ఆమె నిరాకరించారు. ఆ తర్వాత ఆమెకు రాష్ట్ర మహిళా ఫైనాన్స్‌ కార్పొరేషన్‌ ఛైర్మన్‌ పదవి లభించింది. ఇప్పుడు ఎమ్మెల్సీగా ఎన్నికయ్యే అవకాశాలు అంతంతమాత్రంగానే ఉన్నాయని తెలిసినా.. పార్టీ అధినేత సూచన మేరకు పోటీకి సిద్ధమయ్యారు. ఊహించని విజయాన్ని సొంతం చేసుకున్నారు.

వివాహం తరవాతా చదువు కొనసాగింపు..

అనురాధ తండ్రి స్వర్గం పుల్లారావు ఆదాయ పన్నుల శాఖలో జాయింట్‌ కమిషనర్‌గా పనిచేశారు. ఆమె డిగ్రీ రెండో సంవత్సరం చదువుతుండగానే పారిశ్రామికవేత్త శ్రీధర్‌తో వివాహమైంది. వివాహం తర్వాత కూడా చదువు కొనసాగించిన ఆమె... 1996లో డిగ్రీ పూర్తి చేశారు. 2007లో జర్నలిజంలో పీజీ పట్టా తీసుకున్నారు.

అనూహ్యంగా రాజకీయాల్లోకి

తెదేపా అధినేత చంద్రబాబు  1999 రాజకీయాల్లోకి తటస్థులను ఆహ్వానించగా..విజయవాడకు చెందిన, పద్మశాలి సామాజిక వర్గానికి చెందిన అనురాధ ఎన్నికల్లో టికెట్‌ కోసం దరఖాస్తు చేశారు. అప్పుడు ఆమెకు పిలుపు రాలేదు. 2000 సంవత్సరంలో విజయవాడ నగరపాలక సంస్థకు ఎన్నికలు వచ్చాయి. మేయరు పదవి బీసీ మహిళలకు రిజర్వు చేశారు. తెదేపా ప్రధాన కార్యాలయం నుంచి అనురాధకు పిలువు వచ్చింది. మొత్తం 18 మంది మహిళలకు ఇంటర్వ్యూలు నిర్వహించారు. ఆ తర్వాత చంద్రబాబుతో ముఖాముఖి. బీఎస్సీ ఎలాక్ట్రానిక్స్‌ చదివిన ఆమెకు, కంప్యూటర్‌ పరిజ్ఞానం కూడా ఉందని తెలుసుకుని... దానికి సంబంధించి చంద్రబాబు పలు ప్రశ్నలు సంధించారు. వాటికి చకాచకా సమాధానాలు చెప్పిన ఆమె చంద్రబాబు దృష్టిలో పడ్డారు. రెండు రోజుల తర్వాత విజయవాడ మేయరు అభ్యర్థిగా ఆమె పేరుని తెదేపా ప్రకటించింది. అప్పటికి ఎలాంటి రాజకీయ అనుభవం లేని అనురాధ... ఆ ఎన్నికల్లో 6,800 ఓట్ల ఆధిక్యంతో ఘన విజయం సాధించారు.

జీవోల మేయర్‌గా పేరు..

ప్రత్యక్ష ఎన్నికల్లో అనురాధ మేయర్‌గా ఎన్నికైనా, పాలకమండలిలో తెదేపా సంఖ్యా బలం తక్కువగా ఉండేది. మొత్తం 50 డివిజన్లలో, తెదేపా 11 మాత్రమే గెలుచుకుంది. మెజారిటీ డివిజన్లను కాంగ్రెస్‌ గెలుచుకుంది. పాలకవర్గ సమావేశంలో మేయరు ప్రతిపాదనలు చెల్లేవి కాదు. కానీ అప్పటి ప్రభుత్వం, ముఖ్యమంత్రి చంద్రబాబు అండతో...ఆమె ప్రత్యేక జీవోల ద్వారా నిధులు మంజూరు చేయించుకుని, విజయవాడలో పలు అభివృద్ధి కార్యక్రమాలు చేపట్టారు. ఆమె హయాంలో విజయవాడకు సంబంధించి సుమారు 17 జీవోలు వచ్చాయి. దాంతో ఆమెను అందరూ జీవోల మేయరని పిలిచేవారు. మేయర్‌గా ఎన్నికయ్యే నాటికి ఆమెకు ఎలాంటి రాజకీయ అనుభవం లేకపోవడంతో... విజయవాడలోని ఎస్‌ఆర్‌ఆర్‌ కళాశాలలో రాజకీయ శాస్త్ర అధ్యాపకులు పార్థసారధి దగ్గరకు ట్యూషన్‌కు వెళ్లి, వివిధ చట్టాలు, సమకాలీన రాజకీయ పరిస్థితులపై అవగాహన పెంచుకున్నారు. సమైక్యాంధ్ర ఉద్యమంలోనూ ఆమె చురుగ్గా పనిచేశారు. 11 రోజులపాటు నిరాహార దీక్ష చేశారు.  

క్యాన్సర్‌ను జయించి..

తెదేపాలో అత్యంత చురుగ్గా పనిచేస్తున్న సమయంలో ఆమెకు క్యాన్సర్‌ సోకింది. ఆమె ధైర్యం కోల్పోకుండా, చికిత్స పొంది క్యాన్సర్‌పై విజయం సాధించారు. ఆ తర్వాత కూడా పార్టీలో అత్యంత క్రియాశీలకంగా వ్యవహరిస్తున్నారు.

బహుముఖ ప్రజ్ఞ

అనురాధ ఒకపక్క రాజకీయాల్లో కొనసాగుతూనే... గత 15 సంవత్సరాలుగా పద్మశాలి ఇంటర్నేషనల్‌ వెల్ఫేర్‌ అసోసియేషన్‌ ఆధ్వర్యంలో తీరప్రాంతంలోని చేనేత సామాజిక వర్గానికి సేవలందిస్తున్నారు. ముస్సోరిలోని లాల్‌బహదూర్‌ శాస్త్రి నేషనల్‌ అకాడెమీ ఆఫ్‌ అడ్మినిస్ట్రేషన్‌ ఆహ్వానం మేరకు 300 మంది ట్రైనీ ఐఏఎస్‌లను ఉద్దేశించి.. ‘నాయకత్వ కళ, మంచి పరిపాలన కోసం బ్యూరోక్రాట్‌లు, రాజకీయ నాయకుల మధ్య సత్‌సంబంధాలు’ అన్న అంశంపై ప్రసంగించారు. వైకాపా ప్రభుత్వ అరాచకాలపై పోరాడినందుకు ఈ నాలుగేళ్లలో ఆమెపై పదికిపైగా కేసులు నమోదయ్యాయి.

అనురాధ ప్రొఫైల్‌

పేరు: పంచుమర్తి అనురాధ
నివాసం: పోరంకి
విద్యాభ్యాసం: సెయింట్‌ ఆన్స్‌ హైదరాబాద్‌, అట్కిన్‌సన్‌ విజయవాడల్లో పాఠశాల విద్యాభ్యాసం
ఇంటర్మీడియట్‌: స్టెల్లా కళాశాల, విజయవాడ
డిగ్రీ: బీఎస్సీ ఎలక్ట్రానిక్స్‌ జేకేసీ కళాశాల, గుంటూరు
మాస్టర్స్‌ డిగ్రీ: ఎంఏ జర్నలిజం
వివాహం: 1995
పిల్లలు: ఒక కుమార్తె. పేరు సాయి శ్రీధరణి
మొదటి పదవి: విజయవాడ మేయర్‌