చట్టసభల గౌరవాన్ని కాపాడేలా గవర్నర్‌ వ్యవహరించాలి: గుత్తా

ఈనాడు, హైదరాబాద్‌: ప్రజల అవసరాలు తీర్చే విధంగా, చట్టసభల గౌరవాన్ని కాపాడేలా గవర్నర్‌ వ్యవహరించాలని శాసనమండలి ఛైర్మన్‌ గుత్తా సుఖేందర్‌రెడ్డి అన్నారు. బిల్లులను పెండింగులో ఉంచడం వల్ల పాలనకు ఆటంకం కలుగుతోందనీ, వాటిలో సవరణలు అవసరమైతే ప్రభుత్వానికి సూచించాలేగానీ, పెండింగ్‌లో పెట్టడం సరికాదన్నారు. శాసనమండలిలోని తన ఛాంబర్‌లో గురువారం ఆయన విలేకరులతో ఇష్టాగోష్ఠిగా మాట్లాడారు. ‘‘టీఎస్‌పీఎస్‌సీ పేపర్‌ లీకేజీ ఘటన ఇద్దరు వ్యక్తుల తప్పిదం. దాన్ని మొత్తం వ్యవస్థకు ఆపాదించడం సరికాదు.  మంత్రి కేటీఆర్‌పై బురదజల్లడం సరికాదు. ఆధిపత్య పోరులో భాగంగానే రేవంత్‌, భట్టి విక్రమార్క పాదయాత్రలు చేస్తున్నారు. నా కుమారుడు అమిత్‌ ఎక్కడ పోటీ చేయాలన్నది అధిష్ఠానం నిర్ణయిస్తుంది’’ అని గుత్తా పేర్కొన్నారు.