శ్రీరాముడు హిందువులకే పరిమితం కాదు: ఫరూక్‌

ఉధంపుర్‌: విశ్వసించే వారందరికీ శ్రీరాముడు దేవుడేనని, ఆయన హిందువులకే పరిమితం కాదని నేషనల్‌ కాన్ఫరెన్స్‌ అధినేత, జమ్మూ కశ్మీర్‌ మాజీ ముఖ్యమంత్రి ఫరూక్‌ అబ్దుల్లా వ్యాఖ్యానించారు. భాజపా అధికారం కోసం రాముడిని ఉపయోగించుకుంటోందని, కానీ ఆయన వారికే దేవుడు కాదని పేర్కొన్నారు. పాంథర్స్‌ పార్టీ గురువారం కశ్మీర్‌లోని ఉధంపుర్‌లో నిర్వహించిన ర్యాలీలో ఆయన మాట్లాడారు. ‘భగవాన్‌ రామ్‌ హిందువులకే దేవుడు కాదు. ఆ మైండ్‌సెట్‌ను మార్చుకోండి. ముస్లింలు, క్రిస్టియన్లు, అమెరికన్లు, రష్యన్లు.. ఎవరైతే ఆయనను విశ్వసిస్తారో వారికి దేవుడే. తామే రాముడి భక్తులమని చెప్పుకొనే వారికి నిజంగా ఆయనపై ప్రేమ ఉండదు. అధికారం కోసం అలా చెబుతుంటారు’ అని ఫరూక్‌ అబ్దుల్లా పేర్కొన్నారు.