Andhra News: ఎమ్మెల్యే శ్రీదేవి ఫ్లెక్సీలను చించేసిన వైకాపా నాయకులు

గోరంట్ల, తుళ్లూరు, న్యూస్‌టుడే: గుంటూరు చంద్రమౌళీనగర్‌లోని తాడికొండ ఎమ్మెల్యే శ్రీదేవి పార్టీ కార్యాలయం వద్ద శుక్రవారం సాయంత్రం నియోజకవర్గానికి చెందిన వైకాపా నాయకులు ఆందోళనకు దిగారు. స్థానికంగా ఎమ్మెల్యే లేకపోవడంతో కార్యాలయం ఎదుట శ్రీదేవికి వ్యతిరేకంగా నినదించారు. క్యాంపు కార్యాలయం వద్దనున్న ఫ్లెక్సీలను చించివేశారు. డబ్బులు తీసుకుని ఎమ్మెల్సీ ఎన్నికల్లో శ్రీదేవి ఓటును అమ్ముకున్నారని, తమకు ఇలాంటి ఎమ్మెల్యే వద్దంటూ నినదించారు. ఫ్లెక్సీలను తొలగిస్తుండగా పోలీసులు అడ్డుకున్నారు. ఈ క్రమంలో వైకాపా నాయకులు, పోలీసులకు మధ్య వాగ్వాదమేర్పడింది. ఆందోళనలో వైకాపా తుళ్లూరు మండల నాయకులు శృంగారపాటి సందీప్‌, బి.వెంకటశివారెడ్డి, జోజి, సీహెచ్‌ సురేష్‌ తదితరులు పాల్గొన్నారు. వారు వెలగపూడిలోని ప్రధాన రహదారిపై శ్రీదేవి దిష్టిబొమ్మనూ దహనం చేశారు.