కేసీఆర్‌ ప్రభుత్వ కుట్రలు, కేసులకు భాజపా భయపడదు: ఈటల

చంచల్‌గూడ, న్యూస్‌టుడే: కేసీఆర్‌ ప్రభుత్వం బనాయించే కేసులు, పన్నే కుట్రలకు భాజపా భయపడదని హుజూరాబాద్‌ ఎమ్మెల్యే ఈటల రాజేందర్‌ అన్నారు. ప్రశ్నపత్రాల లీకేజీ విషయంలో కేసీఆర్‌ ప్రభుత్వం, టీఎస్‌పీఎస్సీ తప్పు చేస్తే.. శిక్ష మాత్రం బీజేవైఎం నాయకులకా అని ప్రశ్నించారు. లీకేజీపై చేపట్టిన ఆందోళన సందర్భంగా అరెస్టయి చంచల్‌గూడ జైల్లో ఉన్న బీజేవైఎం నాయకులను ఆయన సోమవారం పరామర్శించారు. జైలు బయట మీడియాతో మాట్లాడారు. దోషులను వదిలేసి.. బీజేవైఎం నాయకులపై కేసులు పెట్టి బెయిల్‌ రాకుండా ప్రభుత్వం వేధింపులకు గురిచేస్తోందని ఆరోపించారు. టీఎస్‌పీఎస్సీ పాలక మండలిని రద్దు చేసి నిపుణులతో కొత్తగా ఏర్పాటు చేయాలని డిమాండ్‌ చేశారు.