తెలంగాణ తెచ్చుకుంది కేసీఆర్‌ కుటుంబం కోసమేనా?

సీఎల్పీ నేత భట్టి విక్రమార్క

రెబ్బెన, న్యూస్‌టుడే: ప్రాణాలను సైతం పణంగా పెట్టి తెలంగాణను సాధించుకుంది కేసీఆర్‌ కుటుంబంలోని నలుగురి కోసమేనా అని ఒక్కసారి ఆలోచించుకోవాలని ప్రజలకు సీఎల్పీ నేత భట్టి విక్రమార్క సూచించారు. కుమురం భీం జిల్లా రెబ్బెన మండలంలో ‘హాథ్‌ సే హాథ్‌ జోడో’ పాదయాత్ర కొనసాగింది. సోమవారం రాత్రి రెబ్బెన మండల కేంద్రంలో నిర్వహించిన సమావేశంలో భట్టి మాట్లాడారు. జల్‌ జంగల్‌ జమీన్‌ కోసం పోరాడిన కుమురం భీం స్ఫూర్తిని భారాస ప్రభుత్వం పాటించడంలేదని ఆరోపించారు. సామాజిక తెలంగాణ నిర్మాణమే కాంగ్రెస్‌ పార్టీ లక్ష్యమని భట్టి విక్రమార్క పేర్కొన్నారు. కుమురం భీం జిల్లాలో ఎనిమిది రోజుల పాటు 96 కిలోమీటర్ల మేర కొనసాగిన ఈ యాత్ర మంగళవారం నుంచి మంచిర్యాల జిల్లాలో ప్రారంభమవనుంది.