రాహుల్‌పై చర్య.. భాజపా నిరంకుశత్వం: ఏచూరి

దిల్లీ: కాంగ్రెస్‌ అగ్రనేత రాహుల్‌గాంధీపై లోక్‌సభలో ఆగమేఘాలపై వేటు వేయడం భాజపా నిరంకుశత్వానికి దర్పణం పడుతోందని సీపీఎం ధ్వజమెత్తింది. ఈ వైఖరి భాజపా అసహనాన్ని చాటుతోందని విమర్శించింది. ఈ నెల 25, 26 తేదీల్లో దిల్లీలో జరిగిన పార్టీ పొలిట్‌బ్యూరో సమావేశంలో చర్చించిన అంశాలు, చేసిన తీర్మానాలను సీపీఎం ప్రధాన కార్యదర్శి సీతారాం ఏచూరి సోమవారం విలేకరుల సమావేశంలో వివరించారు. ‘‘విపక్ష నేతలపైకి దర్యాప్తు సంస్థల్ని పంపిస్తూ అధికార దుర్వినియోగానికి భాజపా పాల్పడుతోంది. చిన్నచిన్న కారణాలతో రాజకీయ ప్రత్యర్థులపై కేసులు పెడుతోంది. దిల్లీ మాజీ ఉపముఖ్యమంత్రి సిసోదియా అరెస్టు, ఆర్జేడీ నేతలు లాలూప్రసాద్‌, తేజస్వీ, భారాస నాయకురాలు కె.కవితలపై కేసులు దీనికి ఉదాహరణ. అదానీ గ్రూపు తప్పులను భాజపా ప్రభుత్వం నిస్సిగ్గుగా సమర్థించుకొంటోంది’’ అని ఏచూరి పేర్కొన్నారు.