వనపర్తి జడ్పీ సమావేశానికి భారాస సభ్యుల గైర్హాజరు

కోరం లేకపోవడంతో నేటికి వాయిదా

వనపర్తి, న్యూస్‌టుడే: మంత్రి నిరంజన్‌రెడ్డి, వనపర్తి జిల్లా పరిషత్తు ఛైర్మన్‌ల మధ్య విభేదాల ప్రభావం ఆ జడ్పీ సర్వసభ్య సమావేశంపై పడింది. నిరంజన్‌రెడ్డితో విభేదిస్తూ జడ్పీ ఛైర్మన్‌ లోక్‌నాథ్‌రెడ్డి ఇటీవల భారాసకు రాజీనామా చేసిన విషయం తెలిసిందే. మంగళవారం జడ్పీ సర్వసభ్య సమావేశం నిర్వహించగా ఛైర్మన్‌ లోక్‌నాథ్‌రెడ్డి, శ్రీరంగాపూరు జడ్పీటీసీ సభ్యుడు (కాంగ్రెస్‌) హాజరయ్యారు. జిల్లాలో మొత్తం 14 మంది జడ్పీటీసీ సభ్యులు, ఇద్దరు కో-ఆప్షన్‌ సభ్యులున్నారు. ఇద్దరు మినహా 14 మంది గైర్హాజరయ్యారు. కోరం లేకపోవడంతో సమావేశాన్ని బుధవారానికి వాయిదా వేశారు. జడ్పీ ఛైర్మన్‌ మాట్లాడుతూ.. మంత్రి పేరును ప్రత్యక్షంగా ప్రస్తావించకుండా ఓ నేత, కొందరు ఎమ్మెల్యేలు సభ్యులకు ఫోను చేసి సమావేశానికి హాజరుకాకుండా చూశారని ఆరోపించారు.