మా తాత క్షమాపణలు చెప్పారని నిరూపించండి

రాహుల్‌కు రంజిత్‌ సావర్కర్‌ సవాల్‌

ముంబయి: వీర్‌ సావర్కర్‌పై కాంగ్రెస్‌ అగ్రనేత రాహుల్‌గాంధీ ఇటీవల చేసిన ‘క్షమాపణ’ వ్యాఖ్యలపై సావర్కర్‌ మనవడు రంజిత్‌ సావర్కర్‌ స్పందించారు. కాంగ్రెస్‌ నేత తన తాత గురించి తప్పుగా మాట్లాడారని మండిపడ్డారు. దేశ భక్తుడైన సావర్కర్‌ బ్రిటిష్‌ వారికి ఎప్పుడు క్షమాపణలు చెప్పారో సాక్ష్యాధారాలతో నిరూపించాలని రాహుల్‌కు ఆయన సవాలు విసిరారు. రాహుల్‌ వ్యాఖ్యలు చిన్నపిల్లల మాటల్లా ఉన్నాయని, రాజకీయ ప్రచారం కోసం దేశభక్తుల పేర్లను వాడుకోవటం తప్పని దుయ్యబట్టారు. ఈ నేరానికి రాహుల్‌పై చర్యలు తీసుకోవాలని ప్రభుత్వాన్ని కోరారు.