రాహుల్‌ గాంధీని కోర్టుకు లాగుతా!: లలిత్‌ మోదీ వెల్లడి

లండన్‌: ‘మోదీ ఇంటిపేరు’ వ్యాఖ్యలపై లండన్‌లోని కోర్టులో రాహుల్‌ గాంధీపై కేసు వేస్తానని ఐపీఎల్‌ కుంభకోణంలో ఆర్థిక అక్రమాలకు పాల్పడి దేశం నుంచి పరారై లండన్‌లో ఉంటున్న లలిత్‌ మోదీ పేర్కొన్నారు. తనకు ఇప్పటివరకూ ఒక్క కేసులోనూ శిక్ష పడలేదని, అలాంటి తనను పరారైన నేరస్థుడిగా రాహుల్‌ ఎలా విమర్శిస్తారని ఈ 59ఏళ్ల ఐపీఎల్‌ మాజీ అధ్యక్షుడు ప్రశ్నించారు. గాంధీ కుటుంబం కంటే తమ కుటుంబమే దేశానికి ఎక్కువ సేవ చేసిందంటూ తన పూర్వీకుల చిత్రాలను ఆయన ట్విటర్‌లో పెట్టారు.  

*  ప్రధాన మంత్రి మోదీకి అంతర్జాతీయ నేరగాడి మద్దతు లభించిందని కాంగ్రెస్‌ ఎద్దేవా చేసింది. రాహుల్‌ను లండన్‌ కోర్టుకు ఈడుస్తానన్న లలిత్‌ మోదీ వ్యాఖ్యలపై ఆ పార్టీ స్పందించింది.