నిరుద్యోగుల సమస్యలపై కలిసి పోరాడదాం

బండి సంజయ్‌, రేవంత్‌రెడ్డిలకు వై.ఎస్‌.షర్మిల ఫోన్‌ 

ఈనాడు, హైదరాబాద్‌: నిరుద్యోగుల సమస్యల విషయంలో కలిసి పోరాడదామని భాజపా రాష్ట్ర అధ్యక్షుడు బండి సంజయ్‌కుమార్‌, పీసీసీ అధ్యక్షుడు రేవంత్‌రెడ్డికి వైతెపా అధ్యక్షురాలు వైఎస్‌ షర్మిల పిలుపునిచ్చారు. ఈ మేరకు శనివారం ఆమె వారికి ఫోన్‌ చేశారు. పోరాటానికి ఉమ్మడి కార్యాచరణ సిద్ధం చేద్దామని, ప్రగతిభవన్‌ మార్చ్‌కు పిలుపునిద్దామని సూచించారు. కేసీఆర్‌ను ఎదుర్కొనేందుకు ప్రతిపక్షాలు ఏకం కావాల్సిన అవసరం ఉందని పేర్కొన్నారు. ఈ నేపథ్యంలో ఉమ్మడి పోరాటానికి మద్దతు ఇస్తానని బండి సంజయ్‌ చెప్పారని, త్వరలోనే సమావేశం అవుదామని పేర్కొన్నారని షర్మిల తెలిపారు. పార్టీలో చర్చించి నిర్ణయం తీసుకుంటానని రేవంత్‌రెడ్డి పేర్కొన్నారని వెల్లడించారు.