వైకాపా మూకల దాడులతో ప్రమాదంలో ప్రజాస్వామ్యం

తెదేపా పొలిట్‌బ్యూరో సభ్యుడు వర్ల రామయ్య

ఈనాడు డిజిటల్‌, అమరావతి: అమరావతిలో భాజపా నేతలపై దాడి చేసిన వారిపై హత్యాయత్నం కేసులు నమోదు చేయాలని తెదేపా పొలిట్‌బ్యూరో సభ్యుడు వర్ల రామయ్య డిమాండ్‌ చేశారు. వైకాపా మూకలు దాడి చేస్తుంటే పోలీసులు ఎందుకు స్పందించలేదని.. సీఎంకు వ్యతిరేకంగా మాట్లాడే వారందర్నీ చంపేయమని ఆదేశాలిచ్చారా? అని ప్రశ్నించారు. గన్నవరంలో ఎన్నారై అంజన్‌ అరెస్టు, తెనాలిలో తెదేపా కౌన్సిలర్‌పై, అమరావతిలో భాజపా నేతలపై, పుట్టపర్తిలో మాజీ మంత్రి పల్లె రఘునాథరెడ్డిలపై వైకాపా మూకల దాడి జగన్‌రెడ్డి పాలనలో ప్రజాస్వామ్యం ప్రమాదంలో పడిందనడానికి నిదర్శనాలని మండిపడ్డారు. మంగళగిరిలోని తెదేపా కేంద్ర కార్యాలయంలో శనివారం ఆయన విలేకరులతో మాట్లాడారు. ‘‘రాష్ట్రంలో శాంతిభద్రతలు అదుపులోనే ఉన్నాయని డీజీపీ చెప్పగలరా? పుట్టపర్తిలో వైకాపా గూండాలు తెదేపా వారిపై దాడి చేస్తూ.. వాహనాలను ధ్వంసం చేస్తుంటే స్థానిక పోలీసులు చోద్యం చూశారు. మాదిగ సామాజికవర్గానికి చెందిన ఉండవల్లి శ్రీదేవిని వైకాపా మూకలు వేధిస్తున్నాయి. ఆమెను మానసికంగా హింసిస్తారా?...’ అని పేర్కొన్నారు. తన విద్యార్హతల విషయంలో ప్రజలను మోసం చేసిన స్పీకర్‌ చట్టసభల ఔన్నత్యాన్ని ఎలా కాపాడతారని ప్రశ్నించారు.  వివేకా హత్య కేసులో అవినాశ్‌రెడ్డిని అరెస్ట్‌ చేయలేనప్పుడు సీబీఐ ఉనికే ప్రశ్నార్థకమవుతుందని వర్ల రామయ్య పేర్కొన్నారు.