కాంగ్రెస్‌కు మద్దతుపై మమతతో ఏకీభవించిన అఖిలేశ్‌

లఖ్‌నవూ: కాంగ్రెస్‌ బలంగా ఉన్నచోట ఆ పార్టీకే మద్దతిస్తామని పశ్చిమ బెంగాల్‌ ముఖ్యమంత్రి మమతా బెనర్జీ చేసిన ప్రకటనతో తాను ఏకీభవిస్తున్నానని సమాజ్‌వాదీ పార్టీ అధ్యక్షుడు అఖిలేశ్‌ యాదవ్‌ స్పష్టం చేశారు. 2024 ఎన్నికల్లో జాతీయ స్థాయిలో ప్రతిపక్షాల ఐక్యత కోసం కృషి చేయాల్సి ఉందని, ఏ రాష్ట్రంలో ఏ పార్టీ బలంగా ఉంటే అక్కడే పోటీ చేయాలని అభిప్రాయపడ్డారు. బిహార్‌, తెలంగాణ ముఖ్యమంత్రులు నీతీశ్‌ కుమార్‌, కేసీఆర్‌ ఇదే అభిప్రాయాన్ని వ్యక్తం చేశారని మంగళవారం విడుదల చేసిన ప్రకటనలో అఖిలేశ్‌ పేర్కొన్నారు. 2024 లోక్‌సభ ఎన్నికల్లో కాంగ్రెస్‌ బలంగా ఉన్నచోట ఆ పార్టీకే మద్దతిస్తామని మమత సోమవారం ప్రకటించిన సంగతి తెలిసిందే. ఈ నేపథ్యంలో అఖిలేశ్‌ వ్యాఖ్యలు ప్రాధాన్యం సంతరించుకున్నాయి.