ప్రతిపక్షాల విమర్శలు అర్థరహితం

భాజపా రాష్ట్ర అధ్యక్షుడు సోము వీర్రాజు

విశాఖపట్నం (పెదవాల్తేరు), న్యూస్‌టుడే: ప్రపంచ ప్రముఖుల అభినందనలు సైతం అందుకుంటున్న ప్రధాని మోదీ నూతన పార్లమెంటును ప్రారంభిస్తే ప్రతిపక్షాలు విమర్శించడం అర్థరహితమని భాజపా రాష్ట్ర అధ్యక్షుడు సోము వీర్రాజు పేర్కొన్నారు. స్థానిక జిల్లాపరిషత్‌ దరి రాజస్థానీ సాంస్కృతిక్‌ మండలిలో ఆదివారం జరిగిన ప్రధాని ‘మన్‌ కీ బాత్‌’లో ఆయన పాల్గొన్నారు. అనంతరం విలేకరులతో మాట్లాడారు. ప్రధాని నరేంద్రమోదీ నూతన పార్లమెంటు భవనం ప్రారంభిస్తే కేసీఆర్‌, మమతా బెనర్జీలాంటి వారు విమర్శించడమేంటని ప్రశ్నించారు. బీసీ సామాజికవర్గానికి చెందిన వ్యక్తి నూతన పార్లమెంటు భవనం ప్రారంభించకూడదా? అని ప్రశ్నించారు. ‘మన్‌ కీ బాత్‌’లో ప్రధాని నరేంద్రమోదీ ఎన్టీఆర్‌ గురించి ప్రస్తావించడం ఆనందదాయకమన్నారు. త్వరలో కర్నూలులో పెద్దఎత్తున బీసీ సభ ఏర్పాటు చేస్తామన్నారు. ఈ సందర్భంగా భాజపాలో చేరిన పలువురికి పార్టీ కండువా వేసి స్వాగతం పలికారు. మాజీ ఎమ్మెల్సీ మాధవ్‌, పార్లమెంటరీ పార్టీ జిల్లా అధ్యక్షుడు మేడపాటి రవీంద్ర, రాష్ట్ర అధికార ప్రతినిధి సుహాసినీ ఆనంద్‌, నాయకులు, కార్యకర్తలు పాల్గొన్నారు.