జూన్‌ 12న పట్నాలో విపక్షాల భేటీ!

దిల్లీ: కేంద్రంలో ఎన్డీయే ప్రభుత్వానికి వ్యతిరేకంగా జట్టుకడుతున్న విపక్ష పార్టీలు జూన్‌ 12వ తేదీన  పట్నాలో భేటీ కానున్నట్లు సమాచారం. ఇందులో కాంగ్రెస్‌, వామపక్ష పార్టీలతో పాటు తృణమూల్‌ కాంగ్రెస్‌, ఆప్‌ సహా 20 ప్రతిపక్ష పార్టీలు పాల్గొననున్నాయి. ఈ భేటీకి 18 పార్టీల అధ్యక్షులు హాజరవుతారని అంచనా. లోక్‌సభ ఎన్నికల సన్నద్ధత భేటీగా ప్రతిపక్షాలు భావిస్తున్నాయి. భాజపాను ఎదుర్కొనేందుకు అనుసరించాల్సిన వ్యూహంపై ఈ సమావేశంలో చర్చించే వీలు ఉంది. బిహార్‌ ముఖ్యమంత్రి నీతీశ్‌ కుమార్‌ గత కొంతకాలంగా ప్రతిపక్ష పార్టీలను ఏకతాటిపై తీసుకొచ్చేందుకు తీవ్ర ప్రయత్నాలు చేస్తున్నారు. ఈ క్రమంలోనే  ఆయన ప్రతిపక్ష పార్టీల భేటీకి తేదీని నిర్ణయించినట్లు సమాచారం.