బ్రిజ్‌భూషణ్‌పై ఎందుకు చర్యలు తీసుకోవడం లేదు?

ఎమ్మెల్సీ కవిత 

ఈనాడు - హైదరాబాద్‌, నిజామాబాద్‌: రెజ్లర్లను లైంగికంగా వేధించినట్లు ఆరోపణలు ఎదుర్కొంటున్న బ్రిజ్‌భూషణ్‌పై ఎందుకు చర్యలు తీసుకోవడం లేదని కేంద్ర ప్రభుత్వాన్ని భారాస ఎమ్మెల్సీ కల్వకుంట్ల కవిత ప్రశ్నించారు. గత కొంతకాలంగా దేశ రాజధానిలో రెజ్లర్లు నిరసనలు.. ఆందోళనలు తెలుపుతున్నా కేంద్రం పట్టించుకోవడం లేదని విమర్శించారు. ఇప్పటికైనా రెజ్లర్లు లేవనెత్తుతున్న అంశాలను పరిగణనలోకి తీసుకుని తగిన పరిష్కారం చూపాలని బుధవారం ఒక ప్రకటనలో డిమాండ్‌ చేశారు. కష్టపడి, నిబద్ధతతో, దేశభక్తితో మహిళా రెజ్లర్లు ప్రపంచానికి భారతదేశ ప్రతిభను చాటిచెప్పారని.. ఎమ్మెల్సీ కవిత గుర్తుచేశారు. ‘పోక్సో’ వంటి తీవ్రమైన అభియోగాలు ఉన్నప్పటికీ నిందితుడు బయట తిరుగుతున్నారని, బాధితులకు న్యాయాన్ని నిరాకరించరాదని పేర్కొన్నారు.