నవంబరులో తెలంగాణలో ప్రభుత్వం ఏర్పాటు చేస్తాం: తరుణ్‌ఛుగ్‌

ఈనాడు, దిల్లీ: వచ్చే నవంబరులో తెలంగాణలో భాజపా ప్రభుత్వం ఏర్పడటం ఖాయమని ఆ పార్టీ రాష్ట్ర వ్యవహారాల ఇన్‌ఛార్జి తరుణ్‌ఛుగ్‌ ధీమా వ్యక్తంచేశారు. గురువారం ఆర్మూర్‌కు చెందిన పైడి రాకేష్‌రెడ్డి.. ఎంపీ ధర్మపురి అర్వింద్‌ సమక్షంలో భాజపాలో చేరగా.. తరుణ్‌ఛుగ్‌ తన నివాసంలో కాషాయ కండువాకప్పి పార్టీలోకి ఆహ్వానించారు. అనంతరం విలేకరులతో మాట్లాడుతూ.. తెలంగాణలో ప్రస్తుతం సాగుతున్న అవినీతి, కుటుంబపాలనను అంతంచేసే శక్తి భాజపాకు మాత్రమే ఉందని పేర్కొన్నారు. భారాసను రూపుమాపే వ్యాక్సిన్‌ భాజపానే అని అర్వింద్‌ వ్యాఖ్యానించారు. కాంగ్రెస్‌లో గెలిచిన ఎమ్మెల్యేల్లో మూడొంతుల మంది పార్టీ ఫిరాయించారని, వచ్చే ఎన్నికల్లో ఆ పార్టీ నేతలు గెలిచినా, ప్యాకేజీ మాట్లాడుకొని వెళ్లిపోతారని అన్నారు.