ఎన్నికలకు ముందే ‘తల్లికి వందనం’ టోకెన్లు

తెదేపా రాష్ట్ర అధ్యక్షుడు అచ్చెన్నాయుడు

కోటబొమ్మాళి, న్యూస్‌టుడే: రాష్ట్రంలో అన్నివిధాలా సంపద సృష్టిస్తూ పేదల కోసం ప్రకటించిన ప్రతి సంక్షేమ పథకాన్ని పక్కాగా అమలు చేస్తామని తెదేపా రాష్ట్ర అధ్యక్షుడు కింజరాపు అచ్చెన్నాయుడు తెలిపారు. శ్రీకాకుళం జిల్లా కోటబొమ్మాళిలో శనివారం పార్టీ శ్రేణులతో సమావేశమైన సందర్భంగా ఆయన మాట్లాడారు. పార్టీ మినీ మేనిఫెస్టోలో ప్రకటించిన ‘తల్లికి వందనం’ పథకం అమలులో భాగంగా అర్హులైన పిల్లలందరికీ (ఇంటిలో ఎంతమంది ఉంటే అంత మందికీ) ఎన్నికలకు ముందుగానే టోకెన్లు ఇవ్వనున్నట్లు చెప్పారు. ముఖ్యమంత్రి జగన్‌ అర్హులందరికీ అమ్మఒడి ఇస్తానని చెప్పి కొందరికే పరిమితం చేశారని, నిబంధనల సాకుతో ఏటేటా కోత పెడుతున్నారని ఆరోపించారు.